A cewar rahoton sashen ƙasa da ƙasa na Kamfanin Dillancin Labaran Hauza daga Najeriya, an gudanar da gagarumin taron murnar zagayowar haihuwar Annabi Muhammad (S), tare da halartar wasu daga cikin ’yan’uwa Musulmi mabiyan Sayyid Ibraheem Ya’aqub Zakzaky (H) na Da’irar Bauchi, a yammacin ranar Laraba, 30 ga Satumba, 2026, wanda ya yi daidai da 18 ga Rabi’us-Thani, 1448H, a babban filin wasan ƙwallon ƙafa na Barewa, da ke yankin Railway a birnin Bauchi.
An buɗe taron da karatun wasu ayoyin Alƙur’ani mai girma da addu’a. Daga nan ne ƙungiyar Ittihadush-Shu’ara ta gabatar da waƙoƙin yabo ga Manzon Allah (S) da Ahlul-Baiti (AS).
Bayan haka, Harisawan Da’irar Bauchi sun gudanar da wani faretin girmamawa na musamman ga Manzon Allah (S), kafin Sheikh Sidi Munir Sokoto, babban bako a taron ya gabatar da jawabin taron.
Matsayi na Musamman da Manzon Allah (S) Yake da Shi a Alƙur’ani
Sheikh Sidi Munir ya fara jawabinsa da gode wa Allah Maɗaukaki, tare da bayyana farin cikinsa da halartar wannan taro, sannan ya jaddada muhimmancin haƙuri da tsayin daka ga muminai a cikin yanayin da ake ciki.
Ya bayyana cewa Manzon Allah (S) yana da babban matsayi a wajen Allah, yana mai cewa shi ne mafi darajar halittun Allah, kuma Alƙur’ani mai girma ya bayyana matsayinsa na musamman ta hanyoyi daban-daban.
Malamin addinin ya kafa hujja da aya ta 31 daga Suratul Ali-Imran, inda ya bayyana cewa Allah Ya danganta samun ƙaunarsa da bin ManzonSa (S), don haka mumini mai son samun ƙaunar Allah dole ne ya bi ManzonSa (S).
Haka kuma ya yi ishara da aya ta 29 daga Suratul Fath, wadda ta bayyana wasu daga cikin siffofin Manzon Allah (S) da sahabbansa.
Sheikh Sidi Munir ya kuma yi nuni da aya ta 67 daga Suratul Ma’idah, tare da jaddada cewa irin yadda Allah Ya yi wa ManzonSa (S) magana a cikin Alƙur’ani na nuna matsayi na musamman da wannan babban Manzo yake da shi.
Ƙaunar Manzon Allah (S) Dole Ta Bayyana a Aiki
A wani ɓangare na jawabinsa, Sheikh Sidi Munir ya jaddada cewa ƙaunar Manzon Allah (S) bai kamata ta tsaya ga magana kawai ba, yana mai cewa ƙauna ta gaskiya ga Manzon Allah (S) dole ne ta bayyana a rayuwar mutum da ayyukansa.
Malamin addinin ya yi nuni da ma’anar jihadi da ƙoƙari a tafarkin Allah, yana mai cewa duk lokacin da Allah Ya tayar da mai kira, dole ne wannan mai kira ya kasance yana da alaƙa da Manzon Allah (S) ta fuskar magana da kuma aiki.
Ya jaddada cewa bin Manzon Allah (S) ya kamata ya bayyana a fannoni daban-daban na rayuwar muminai, kuma alaƙa da Manzon Allah (S) bai kamata ta tsaya ga furta ƙauna da baki kawai ba.
Ruwaya Kan Yadda Salati Zai Taimaki Mutum a Kabari
A ci gaba da jawabinsa, Sheikh Sidi Munir ya yi magana kan falalar yawaita salati ga Manzon Allah (S), inda ya kawo wata ruwaya mai ɗauke da darasi game da wani bawan Allah da yake yawan yi wa Manzon Allah (S) salati a lokacin rayuwarsa.
Ya ce, bayan wannan mutum ya rasu aka kai shi kabari, Mala’ikun Munkar da Nakir suka zo masa domin yi masa tambayoyi, amma ya kasa ba su amsa.
A wannan lokaci ne wani mutum mai kyakkyawar siffa ya bayyana a gabansa, ya riƙa ba da amsoshin tambayoyin da Mala’ikun suke yi, shi kuma mamacin yana maimaita amsoshin, har aka kammala tambayoyin.
Bayan Mala’ikun sun tafi, sai mamacin ya tambayi wannan mutum mai kyakkyawar siffa ko wane ne shi, da kuma yadda ya san halin da yake ciki har ya zo domin taimaka masa.
A cewar wannan ruwaya, mutumin ya amsa masa da cewa: “Ni ne salatin da kake yi wa Manzon Allah (S) a lokacin da kake raye. Allah Ya suranta ni cikin siffar mutum, Ya aiko ni domin in taimake ka.”
Bayan ya kawo wannan ruwaya, Sheikh Sidi Munir ya jaddada muhimmancin dagewa wajen yin salati ga Manzon Allah (S), tare da kira ga muminai da su ƙarfafa alaƙarsu da ƙaunarsu ga Manzon Allah (S) tun suna raye.
Kira Zuwa Ga Bin Manzon Allah (S)
A ƙarshen jawabinsa, mai gabatar da jawabin ya yi kira ga mahalarta da su bi Manzon Allah (S) a dukkan al’amuran rayuwarsu, tare da jaddada muhimmancin haɗa imani, ƙauna da aiki.
Ya kuma yi ishara da matsayin Jamhuriyar Musulunci ta Iran, yana mai bayyana cewa matsayi da darajar da ƙasar ta samu sun samo asali ne daga alaƙa da Allah da Manzon Allah (S) ta fuskar magana da kuma aiki.
A ƙarshe, Alaramma Doya ya yi godiya ga mahalarta da masu shirya taron, sannan Sheikh Sidi Munir Sokoto ya rufe taron murnar Maulidin Manzon Allah (S) da addu’a.
Ra'ayinka